BELI
SANE KAAPTIANG
Duk
punika rahina sukra wuku kuningan warsa 2008, titiang malancaran ka pasisi
Sanur sareng suitran-suitran titiang akeh. Becik pisan pemandangan ring pasisi
Sanur ritatkala galahe sampun sanja. Ombake pakebyur-byur tur angine sane
pakesir-sir ngetesin dewek. Irika ring pasisi Sanur titiang sareng
suitran-suitran makasami pada macanda girang. Wenten sane kayeh ring tengahing
sagara, ngelangi nglwan ombak sane magulung-gulung, mapendem ring bias,
matembang girang, taler wenten sane matumbasan jagung bakar tur lumpia. Irika
titiang sareng suitran titiang Sari kayeh ring tengahing sagara sinambi macanda
saling gablesin toya. Sawireh sampun sue titiang kayeh tur macanda, titiang
sampun marasa leleh laut titiang mawali nuju ka sisi sagara. Ring sisi sagara
titiang negak padidi sinambi ngelingan makasami sane wenten ring sagara,
mailehan paningalan titiang ngatonang anake sane ramia wenten ring sagara,
ritatkala titiang nyeledet ngalerang, jeg saget titiang ngatonang anak lanang
mamargi padidian. Muanyane bagus,alep tur nganyudang hati.
Titiang
nenten uning napi sane makada manah titiang marasa liang, tur kleteg manah
titiang taler mrasa tios nenten sakadi biasane sasukat titiang ngatonang anak
lanang punika. Titiang mrasa angob teken paras anake punika. Sinambi negak ring
sisi sagara titiang melengok bengong padidian, nenten uning napi sane
kakenehang. Nenten sue raris titiang marasa wenten anak sane majujuk ring
ungkur dewek titiang, raris titiang nyeledet, jeg saget cingakin titiang anak
lanang sane iwawu cingak titiang sane majujuk ring ungkur dewek Titiang.
Titiang makesiab sinambi mangenahang “aduuuhh to nguda anak lanang puniki
wenten paek iriki…”. Titiang nenten uning napikeh titiang lakar tetep negak
iriki utawi matilar. Manah titiang marasa liang sawireh anak lanang sane alep
bagus punika wenten paek sareng titiang, nanging Titiang taler marasa jejeh.
Anggen ngengkekebin rasa jejeh, titiang negak sinambi mecilin bias. Raris anak
lanang punika mapajar “Gek.., dados titiang sareng negak iriki??”. Titiang makesiab.
Rasa liang, rasa jejeh aor dados asiki ring manah titiang miragi atur anak lanang
punika. Sinambi jejeh raris titiang nyawis pitaken anak lanang punika, “oooh
nggih Bli dados, durusang Bli malinggih”. Raris anak lanang punika malinggih
ring samping titiange. Minab sampun wenten tengan jam titiang sareng kalih
negak nanging pada-pada meneng. Titiang meled mataken sira wastan anak lanang
puniki, nanging titiang mrasa teken dewek eluh nenten kemad yening mataken
dumunan. Ring manah titiang mangenehang, “aduuh juari napi ten nggih??”. Sue
titiang mangenehang, saget anak lanang punika mapajar,
“praragan
mriki gek??”. Titiang raris nyawis,
“
oh ten Bli,tiang sareng suitran-suitran titiang malancaran mriki, Bli praragan
mriki nggih?”
“
ten Gek, tiang taler sareng suitran-suitran titiang mriki, Gek ring dija
meneng?”
“
Tiang meneng ring desa Angantaka Bli”
“
oh Angantaka..”
“
nggih Bli, uning Angantaka Bli? Bli ring dija meneng?”
“
nggih uning Gek, niki Gek Tiang meneng ring Batubulan banjar Tegehe”
“ooh..”.
Titiang nenten uning napi sane jagi
malih katakenin. Titiang raris meneng. Anak lanang punika taler meneng. Nenten
sue raris anak lanang punika malih mataken,
“
yeeh dados lali nggih tiang nakenin wastan Gek sira. Dados Tiang uning wastan
gek sira?”
“
nggih dados Bli, tiang Komang”
“
Komang.. nggih wastan tiang Gede Mang (sambil majabat tangan)”.
Wawu
asapunika titiang ngorti sareng Gede raris rauh suitran titiang Sari miwah
suitran titiang sane lianan jagi ngajakin budal. Sahasa rahat manah titiang yening
budal sawireh karasayang jebos pisan titiang polih ngorti sareng anak lanang
punika. Nanging galahe sampun wengi titiang patut budal, yening nenten budal
pastika Bapa tur Memen titiange ring canggah pacang umung. Sadurunge titiang
budal, titiang mapamit dumun tur mangorahang,
“
Bli, tiang dumunan budal nggih?”
“
oh nggih Mang alon-alon nggih..”
“
nggih Bli..”
Ring margi nuju ka canggah, tan
wus-wusan titiang mangenehang parindikan iwawu ring sagara. Nenten uning napi
sane makada manah Titiang ngrsayang rasa kadi asapuniki. Sarauhe ring canggah,
titiang laut kayeh, muspa ring mrajan, raris nyiyagayang buku-buku sane patut
kabakta kuliah benjang. Titiang kuliah ring IKIP PGRI DENPASAR, jurusan bahasa
Bali tur wawu semester 1. Wusan titiang nyiyagayang buku-buku raris titiang
sirep-sirepan ring pasirepan sinambi mangenehang, napi sane makada kleteg manah
titiang ngrasayang tios sasukat kacunduk sareng Gede ring sagara iwawu. Nembe
pisan titiang ngrsayang sakadi puniki, napikeh niki sane kawastanin jatuh tresna???,
Titiang nenten uning. Titiang taler mangenehang napikeh titiang pacang kacunduk
malih sareng Gede??, pangaptin titiange wantah titiang prasida kacunduk malih
sareng Gede. Sue titiang mangenehang punika nenten karasa ngantos sirep titiang
mangenehang indike punika.
Karasayang jebos pisan titiang polih
sirep, saget galahe sampun enjing. Titiang raris kayeh jagi pacang mamargi
kuliah. Gelisang crita, titiang sampun rauh ring parkiran kampus IKIP, wawu titiang
ngelesang helm tur jaket, saget wenten anak sane nyeritin titiang, “ Mang..
Komang..”. Titiang nyeledet sira sane nyeritin titiang iwawu, jeg saget Gede
sane nyeritin titiang, Gede sane cingak titiang dibi ring sagara. Titiang
makesiab tur mangenehang to nguda Gede wenten iriki. Gede raris ngrereh titiang
tur maekin titiang,
“
yee Komang kacunduk malih iriki..”
“
nggih Bli, kuliah driki Bli?”
“
nggih Mang tiang kuliah driki Mang, tiang ngrereh jurusan bahasa Bali, Komang
taler kuliah iriki nggih?’’
“
nggih tiang kuliah driki Bli, tiang taler ngrereh jurusan bahasa Bali, sampun
semester kuda nika Bli?”
“
oh pateh nggih, tiang wawu semester 1 Mang, nanging niki wawu dina pertama tiang
kuliah Mang, santukan wenten karya ring mrajan, sampun kalih sasih tiang nenten
prasida kuliah Mang, niki wawu tiang mrasidayang kuliah ”
“
oh kenten..”
“
nggih Mang, Komang ampun semester kuda?”
“
pateh sareng Gede, tiang taler wawu semester 1, Bli sampun uning polih ring
kelas napi?”
“
sampun Mang, tiang polih kelas I.E ring ruang 18 Mang, Komang uning ring dija
genah ruang punika?, yening dados tiang nunas tulung ring Komang iringang jebos
tiang ngrereh ruang 18 punika.”
“
oh De polih ruang 18 nggih, kelas tiang taler drika De,”
“
oh kenten, sadia pisan nasib tiang ring dina mangkin,”
“
nggih yening kenten ngiring De sareng-sareng mamargi ka kelas,”
“
nggih Mang ngiring,”. Sapamargin titiang sareng Gede nuju ka kelas, manah tiang
ngrasayang liang pisan. Pangaptin titiang sane meled kacunduk malih sareng Gede
sampun kadagingin mangkin. Nenten sahasa yening anak lanang sane alep bagus
punika taler kuliah ring IKIP, napi malih kelas titiang sareng Gede punika
pateh.
Sarauhe titiang sareng kalih ring
kelas, Titiang raris negak ring bangku sane sampun kasiagayang. Tur Gede ngereh
genah malinggih ring ungkur bangkun titiange. Kacaritayang ring kelas titiange
sampun polih kalih mata kuliah, galah sampun jam 12, pinaka galah mahasiswa
pada budal. Titiang raris budal sareng suitran- siutran titiang. Sarauhe ring
pacanggahan titiange, titiang digelis ngentosin baju raris Titiang ngambil HP, cingakin
titiang wenten 1 pesan sane masuk ka HP Titiange. Raris titiang bukak tur titiang
wacen, pesannyane skadi puniki,
“ Mang,
suksma nggih wawu sampun nyadia ngiring titiang mamargi ngereh kelas. Mang
sampun rauh ring jero niki?_Gede”.
Sahasa
nenten percaya yening Gede sane ngirim pesan punika, rasa liang malih
karasayang, raris titiang ngawales pesan saking Gede punika,
“ nggih Bli, niki wawu tiang teked
ring pacanggahan”.
Titiang
nenten uning ring dija Gede polih nomor HP Titiange. Nenten karasa sampun
wenten kali jam titiang sareng kalih saling kirim pesan tur saling ngwales
pesan. Tan kadi-kadi manah titiang
ngrasayang liang. Titiang nenten uning napi sane karasayang, yening kacunduk
sareng Gede kleteg manah titiang matiosan nenten sakadi biasane. Minab niki
sane kawastanin jatuh tresna. Nanging titiang nenten purun mastikayang titiang
sampun jatuh tresna teken Gede. Kacrita sampun kalih sasih titiang ngrasayang
rasa sakadi puniki. Kalih sasih punika titiang sareng Gede sarahina kacunduk
ring kampus, taler nenten karasa rasa sane pendem titiang puniki ngancan ngedenan
napi malih ring kampus titiang prasida ngelingan sapari polahnyane Gede
sarahina. Gede wikan tur bhakti. Sane
makada titiang sayan angob teken Gede, sarahina cingak titiang Gede yening
sampun rauh ring kampus pastika simpang dumun ka padmasana ring kampus
ngaturang bhakti. Selami kalih sasih punika taler sarahina Gede pastika polih
manten sms Titiang utawi nelpon
titiang, punika sane makada titiang sareng kalih sayan paek tur akrab. Ngancan
sue ngancan sayan uning titiang parisolah anak lanang bagus alep punika. Rasa
sane pendem titiang puniki ngancan sue ngancan ngedenang. Sarahina titiang
mangenehang napikeh rasa puniki wantah titiang kemanten sane ngarasayang nanging
Gede nenten ngarasayang pateh sakadi napi sane rasayang titiang. Punika taler
sane makada titiang marasa jejeh tur mrasa inguh. Nenten iwang karasayang
yening titiang pendem kemanten rasa puniki teken Gede.
Sampun petang sasih galahe mamargi.
Duk punika ring kampus sampun kagelarang Ujian Akhir Semeter. Sapamargi rikala
ujian punika titiang sareng Gede sayan akrab. Titiang mataken teken Gede yening
titiang nenten mrasidayang nyawis pitaken-pitaken sane wenten ring ujian,
asapunika taler Gede, yening ipun nenten mrasidayang nyawis pitaken-pitaken
sane wenten ring ujian, ipun mataken ring titiang. Rahina saniscara, wusan titiang
nyawis makasami pitaken-pitaken sane wenten ring ujian tur makta lembar jawaban
ka ajeng kelas raris titiang mataki-taki jagi budal, cingak titiang Gede sampun
nenten wenten ring kelas. Titiang raris mamargi budal nuju ka parkiran kampus.
Satibane titiang ring parkir cingak titiang Gede malinggih ring motor titiange.
Raris titiang mataken,
“
durung budal De?”
“
durung Mang Tiang negak iriki nyantosin Mang, wenten akidik sane jagi meled
kaorahang teken Mang. Dados tiang nunas galah Mang?”. Sinambi makesiab, jejeh
tur mangenehang napi sane jagi kaorahang olih Gede teken padewekan titiang
raris titiang nyawis,
“
ooh nggih dados De, napi sane jagi orahang Gede sareng titiang?”. Irika raris
Gede nyambatang tresna ring sikian titiang, ipun ngorahang kleteg manah ipune
matiosan sasukat kacunduk sareng titiang ring sagara, sampun petang sasih ipun
taler mendem rasa tresna ring sikian titiang. Manah titiang ngrasayang liang
tan kadi-kadi, sawireh rasa jejeh sane rasayang titiang salami petang sasih
puniki nenten ja sakadi sane kakenehang titiang. Nenten ja titiang kemanten
sane ngrasayang tresna. Rasa sane rasayang titiang taler karasayang olih Gede.
Liang manah titiang. Irika taler titiang ngorahang rasa sane sampun pendem titiang
ring Gede suennyane petang sasih. Sasukat rahina sanicara punika titiang sampun
ngadungang tresna sareng Gede. Bagia pisan rasayang titiang sarahina prasida
kacunduk sareng Gede ring kampus. Sapamargi titiang ngadungang tresna nenten
naenin titiang madue rasa leleh yening kuliah. Sapamargi titiang nuju kampus
manah titiang ngarasayang liang, rasa liang taler karasayang sapamargin titiang
budal saking kampus. Rasa tresna Gede ring sikian titiang sayan-sayan prasida
rasayang titiang saking rasa uratian Gede kapining titiang. Kacaritayang sampun
10 sasih titiang ngadungang tresna sareng Gede. Slami 10 sasih punika, makudang-kudang
rasa sampun kecapin titiang. Rasa liang, rasa sebet miwah rasa sakit. Reraman titiang
sampun taler uning yening titiang sampun ngadungang tresna sareng Gede.
Asapunika taler reraman Gede sampun uning yening Gede sampun ngadungang tresna
sareng titiang. Bagia pisan manah titiang prasida molihang anak lanang sakadi
gegelan titiang Gede. Anak lanang sane mula aptiang wantah sakadi Gede. Gede
sakadi angin ngetesin dewek titiang taler sakadi bulan sane stata nyunarin.
Dumogi Gede prasida nresnain titiang tulus ring hati, satya teken janji,
tresnan Gede teken titiang nenten keni gagodan taler dumogi tresnan titiang
stata kaiket mangda prasida langgeng ngantos riwekasan. Prasida sakadi sepite
yening puun stata bareng-bareng, sagilik saguluk salunglung sabayantaka. Wantah
Beli Gede sane stata aptiang. Dumogi Bli Gede sida glantingin titiang.
Kakripta
olih: Ni Nyoman Toyantari
